BACOLOD CITY – Kaso nga homicide ang pangatubangon sang lalaki nga nakapatay sang iya nga kaingod paagi sa pagpungkoy sang bato sa Purok Nabalian, Barangay Taculing, las-9:30 kagab-i.
Nahibaluan nga napatay ang biktima nga si Manuel Dato-on, 57-anyos bangud sa pagpungkoy sang bato sang suspetsado nga si Camilo Aboy, 29-anyos.
Ginpahayag nagainom-inom si Aboy upod sa pito ka iban pa nga kalalakin-an sang maglabay ang hubod man nga si Dato-on kun sa diin iya ginsaway ang mga ini nga indi maggahod bangud magatulog ini.
Apang pila ka minutos ang nagligad, liwat nagbalik si Dato-on nga may dala na nga binangon rason nga nagdinalagan ang mga nagainom-inom apang nabilin si Aboy.
Ginlabu ini ni Dato-on apang iya nasagang sang iya natuo nga butkon rason sang pagkapilas kag pagkatumba sini.
Nakapulot sang bato si Aboy kag ginhaboy ini kay Dato-on nga nagtupa sa iya nga nawong rason nga ini ang nakaatras.
Naghana sa liwat paglabu kay Aboy si Dato-on apang liwat ini nakapulot sang bato kag ginpungkoy sa nawong sang suspetsado.
Magapalagyo kuntani si Dato-on apang ini ang natumba samtang si Aboy ang nagpauli agud bulngon ang iya pilas.
Ulihi na sang iya nahibaluan nga si Dato-on ang gindala sa Corazon Locsin Montelibano Memorial Regional Hospital (CLMMRH) apang gindeklarar nga dead on arrival.
