Ginakahangaw-an sang mga otoridad nga nagpatay sang ginatos ka mga tawo ang nagluntad nga landslide sa malayo nga minuro sang Papua New Guinea kag bangud sini nalubong ang masobra sa 100 ka mga balay.
Ini ang nagluntad sa highlands sang Enga sa naaminhan nga bahin sang island nation sa south-west Pacific.
Indi pa maathag sa karun kun pila ka mga tawo ang natampukan sang duta.
Suno kay Andrew Ruing, isa ka community leader, ang mga tawo ang nagakatulog sang nagluntad ang landslide.
Ginalantaw man ni Ruing nga masobra 300 ka mga tawo ang natampukan sang mga debris kag bato.
Nalakip man sa natabunan ang mga pagkaon, garden kag mga propiedad.
Ginpahayag man sang Care Australia, isa ka Humanitarian organisation, ang lugar indi man masyado kadamo ang mga tawo, apang ang ginakahangaw-an sang mga ini nga tuman kadamo ang mapatay bangud sa trahedya.
Dugang pa sini nga madugayan ang paghawan sa alagyan kag ini ang mangin upang sa assessment kag relief efforts.
Suno naman kay James Marape, Prime Minister sang Papua New Guinea, nga nakapadala na ang gobyerno sang mga disaster officials sa ginluntaran sang insidente agud nga magpanagtag sang bulig, magpatigayon sang retrieval operations kag pagpatindog liwat sang infrastructure.
