Isa ka makabig nga miracle baby ang ginbata sang Martes sa isa ka quarantine facility sa ciudad sang Bacolod.
Ang iloy nga ginkilala kay Julie Ann Arnado, 36 anyos, residente sa Barangay Sum-Ag, Bacolod City.
Suno kay Bacolod City Councilor Cindy Rojas, si Arnado ang nagpaswab matapos nga naglupok ang panubigan sini nga senyales nga malapit na ini magbata sang Martes.
Ini bangod wala sang magabatun nga ospital sa isa ka pasyente tubtob nga wala ang mga ini nakapaswab test.
Ginpili naman sini nga magpabilin nalang sa Education and Training Center School 4 (ETCS-4) bangod mas malapit ini sa ospital.
Apang sang magpasakit na ini sang Martes sang udto, indi naman sang mga ini makontak ang Bacolod City Disaster Risk Reduction Management Office (CDRRMO), bangod sa sako man ang mga ambulansya sa pagpatigayon sang extraction sang mga nagpositibo sa COVID-19 sa ciudad.
Ginpakamaayo naman ni Rojas nga yara ang tatlo sini ka staff nga gin-assign sa pasilidad nga ginkilalal kanday Glenda, Yvonne kag Flavian nga amo ang nagpabata kay Arnado apisar nga wala ang mga ini sang medical backgrounds sa pagpabata.
Ginkulbaan pa ang mga staff matapos nga wala maghibi ang ginbun-ag nga lapsag gani ginmasahe pa sang mga ini ang dughan, tubtob sa ini ang nakahibi.
Gilayon naman nga ginhingagaw sang CDRRMO sa Riverside Medical Hospital, nga amo lang ang may nabilin nga available nga lugar para sa pasyente, ang iloy kag ang lapsag.
Apang suno kay Rojas, nagpanawag naman pagkahapon sa iya ang isa pa sa mga anak ni Arnado nga nagapahayag nga indi nila masarangan ang bill sa pribado nga ospital ilabi na nga pot making lang man ang ila nga palangabuhian.
Gintawagan naman ni Rojas ang Neonatal Head sang Corazon Locsin Montelibano Memorial Regional Hospital, kag nagdangat pa sa gab-i ang paghingyo sini tubtob sa mapahanugutan nga makasaylo sa OB Gyne Department ang lapsag.
Ginapakamaayo naman nga makatinir ang lapsag sa ospital bangod premature ini nga yara lang sa walo ka bulan sa tiyan, gani dapat pa ini nga magpabilin sa ospital tubtob sa ikasiyam nga bulan.
Ang miracle baby ang ginkilala kay Baby Gabriel, nga ikaapat na sa mga kabataan ni Julie Ann Arnado.
