BACOLOD CITY — Kabug-usan nga 1,027 ka mga hagna ukon legislative concerns ang gin-aktuhan sang Sangguniang Panlalawigan sang Negros Occidental sa una nga tuig sang pagpungko sang subong nga set sang provincial board members.
Sa legislative report si Vice-Governor Eugenio Jose “Bong” Lacson sa ginpatigayon nga regular session sang Sangguniang Panlalawigan kahapon, ginpahayag ni Lacson nga humalin Hunyo tubtob Disyembre 2016, nagalab-ot sa 445 ka mga resolusyon, tatlo ka mga ordinansa kag 13 ka mga appropriation ordinances, lakip na ang 2.9 bilyones pesos nga budget para sini nga tuig 2017.
Humalin Enero tubtob Hunyo 2017 naman, nagalab-ot sa 556 ka mga resolusyon, anom ka mga ordinansa kag apat ka appropriation ordinances ang napasar.
Nalakip naman sa mga ginhatagan sang pagtamod sang provincial board ang pagrepaso sang mga ordinansa sang mga banwa kag ciudad sa probinsiya, pag-akto sa urgent resolutions nga ginaduso ni Gov. Alfredo Marañon Jr. kag ang mga mainit nga issues nga nagaapekto sa kaayuhan sang mga pumuluyo sang Negros Occidental.
Ini nga mga issue ginalakipan sang pag-eksister sang Negros Island Region, kampanya kontra ilegal nga droga, High Fructose Corn Syrup (HFCS) kag iban pa.
Ginpasalamatan naman ni Lacson ang mga katapo sang SP sa ila nga kooperasyon agud maduso ang kaayuhan sang mga pumuluyo.
Ginpahayag ni Lacson nga ang ila mga tikang ang para sa kaayuhan sang mga pumuluyo sang probinsiya.
Aminado ini nga madamo pa sang dapat obrahon kag mga pagpanghangkat nga dapat atubangon sa nabilin nga duha katuig sang ila termino apang labaw sa tanan, ang intereses sang mga pumuluyo amo ang ginatib-ong sang tagsa nila ka desisyon kag aksyon.
Suno kay Lacson, bilang bise-gobernador sang probinsiya, ginapanan-aw sini ang malipayon kag maayong panglawason sang mga Negrosanon apang ginpabutyag sini nga ang Negros First Development Agenda sang administrasyon ni Governor Alfredo Marañon Jr. ang malab-ot lamang kun magabinuligay kag magasuportahanay ang tanan.
