Ginsiguro sang National Telecommunications Commission (NTC) ang madasig nga pagpatuman sang direktiba ni Presidente Ferdinand Marcos Jr. nga maghatag sang libre nga tawag, text, kag data para sa mga Overseas Filipino Workers (OFWs) sa mga pungsod nga apektado sang tensyon sa Middle East kag sa ila mga himata sa Pilipinas.
Lakip na diri ang “Libreng Tawag Program” para sa mga OFW sa Iran, Iraq, Bahrain, Kuwait, Oman, Qatar, United Arab Emirates kag Saudi Arabia agud maistorya nila ang ila mga pinalangga sa kabuhi nga wala sang dugang nga gastos.
Suno kay NTC Commissioner Ella Blanca Lopez, ginadayaw sang komisyon ang gilayon nga pagresponde sang mga telecommunication company nga nag-activate na sang libre nga tawag bilang suporta sa direktiba sang Presidente.
Suno diri, padayon man ang pagmonitor sang komisyon sa implementasyon sang programa agud masiguro nga mabuligan ang mga OFW kag ang ila mga pamilya sa nasambit nga bulig sang gobyerno.
