Ginatun-an pa sang exit planning team sa ciudad sang Bacolod kun may yara sang extension ang ginapatuman nga Enhanced Community Quarantine (ECQ) matapos magpagwa sang rekomendasyon si President Rodrigo Duterte kahapon nga ipaidalom sa General Community Quarantine (GCQ) ang tanan nga mga LGUs nga wala malakip sa high risk areas.
Sa interview sang Bombo Radyo Bacolod kay Mayor Evelio “Bing” Leonardia, pungkuan pa sini kaupod ang si Lone District Congressman Greg Gasataya, Vice Mayor El Cid Familiaran kag mga konsehal sa ciudad sang Bacolod ang angot sa pag-extend sang ECQ sa ciudad.
Suno kay Leonardia, hulaton pa sini ang guidelines nga ipagwa sang Department of the Interior and Local Government angot sa pagpatuman sang GCQ agud makadesisyon sa pagpatuman sini.
Samtang, may yara man sang nagtawag sa hotline sang Bombo Radyo nga isa ka stranded nga Overseas Filipino Worker (OFW) sa Manila nga si Jeffrey Asiendente kag residente sang Barangay Mansilingan, Bacolod City nga nagpanawagan sa alkalde kun mahimo makapauli na ang mga ini bangud nagagutok na sila sa Manila samtang madamo pa ang nagaalalabot nga nagpauli nga OFWs.
Ginpahayag man sini nga willing ang mga ini magshoulder sa pamasahe kag magpaidalom sa quarantine bisan sa remote areas pa ini.
May yara naman ini sang quarantine certificate nga gin-isyu ang Manila sa ila.
Ginpahayag man sang alkalde nga may yara na sang plano si Councilor Rafael Salanga sa mga nagabalik nga stranded OFWs.
Suno sa kay Leonardia, nakig-angot na si Councilor Salanga sa Overseas Workers Welfare Administration (OWWA) bangud indi man madali-dali sang ciudad ang pagrepatriate sa mga ini bangud madamo man nga mga bagay nga dapat ikonsiderar kag isa na diri ang quarantine area facility.
Ginkuha man sang alkalde ang numero ni Asindiente agud maupdate man ang mga ini sang status sang ginahingyo sang mga ini.
