Nagpositibo sa random drug test ang lima ka empleyado sang Negros Occidental Provincial Capitol sa ginpatigayon nga drug test sang Lunes, Hunyo 16, 2025.
Sa interview sang Bombo Radyo Bacolod kay Negros Occidental Provincial Administrator Atty. Rayfrando Diaz, ang random drug testing ang ginpatigayon agud nga malab-ot ang drug free workplace sa provincial capitol.
Suno kay Diaz, ini man ang may kaangtanan sa preparasyon sa renewal sang contract sa job orders kag contract of services employees.
Sila ang ginhatagan sang prayoridad agud nga masiguro nga sila ang nagatrabaho sang matinlo kag drug free sa kapitolyo.
Santo sa resulta lima ang nagpositibo sa paggamit sang illegal substance kag ang mga ini ang gin-endorso na sa Provincial Legal Office para sa nagakaigo nga notices kag proseso.
Suno pa diri, ang mga COS kag JO nga nag positive ,indi na ma-renew ang ila kontrata sa Hulyo kag ini ang polisa ni Negros Occidental Governor Eugenio Jose “Bong” Lacson.
Samtang ang mga regular employees nga nagpositibo sa drug test ang ipaidalom sa treatment agud nga marehabilitate ang mga ini.
