Nagpahayag ang live-in partner sang construction worker nga ginluthang-patay sa Purok Masagana, Barangay Taculing, Bacolod City kapin alas-6:00 kagab-i nga ang biktima ang wala sang bisan sin-o nga kontra.
Ang biktima ang ginkilala nga si Niño Baldevia, 37 anyos, constuction worker.
Sa interview sang Bombo Radyo Bacolod sa Live-In partner si Baldevia ang gikan sa iya ginatrabahuan sa Libertad Public Market antes matabo ang pagpangluthang.
Apang kaangay sa nakaandan sang makapauli ang biktima ang nagtambay sa atubang lamang sang ila balay upod sa apat ka iban pa.
Didto na kag nag-abot ang riding in tandem suspect kun sa diin nagpanaog ang backrider sa motorsiklo, nagpalapit sa biktima kag ini ang ginluthang.
Wala sang mapaminsaran ang live-in partner nga sarang magpatay sa biktima bangod ini ang wala man sang kontra, wala utang, wala kerida kag wala man sang record sa Barangay.
Ginpamangkot man sini ang mga kaupdanan ni Baldevia nga construction workers kag ini ang wala man sang problema sa trabaho.
Suno diri sa 16 ka tuig nila nga pag-updanay masami nga nagasugid sa iya ang iya partner kun may problema, kag ini ang wala man sang may nasugid nga pagpamahog sa iya kabuhi.
Yara man sa iya ang cellphone sang biktima kag wala man ini sang nakita nga makaduluda nga mensahe ukon kaaway sa social media ang iya partner.
Suno pa diri, kape lang gid kag panigarilyo ang bisyo sang biktima, kag ini ang kis-a lamang mag-inom sang makahulubog nga ilimnon, nga kutob lamang sa isa ka botelya nga nagaserbe lang sini nga pampatulog.
Pahayag pa sini nga wala man naga-engage sa illegal nga buluhaton ang iya partner.
Samtang may isa naman ka menor de edad nga nakakita sang pagpangluthang.
Sa interview sang Bombo Radyo Bacolod sa witness, nakahelmet kag nakabonnet ang riding in tandem suspects sang magdulog kag magpalapit sa biktima kag apat sini ka kaupod.
May bitbit nga baseball bat kag armas-luthang ang backrider kun sa diin una pa sini nga ginhan-usan sang baseball bat ang kaupod ni Baldevia nga una nagpalagyo.
Apang nabilin ang biktima kag ini ang didto na ginluthang.
