May patigayunon nga payout sang fuel subsidy sa mga taxi drivers nga wala gid nakabatun gikan sa Land Transportation Franchising and Regulatory Board (LTFRB) humalin sang ginsuguran ang programa sa ciudad sang Bacolod.
Sa interview sang Bombo Radyo Bacolod kay LTFRB-Negros Island Region Director Atty Gerry Llena, ang payout ang patigayunon sa Ayala Capitol Central sa Martes, Agosto 11.
Pahanumdom ni Llena nga ini ang para lamang sa mga wala pagid makabatun sang fuel subsidy nga mga taxi drivers, apang agud makasegurado nga yara sa listahan mas maayo nga magkoordinar anay sa operator.Ini agud indi na mag-uyang sang tiyempo sa pagpadulong sa venue kun wala man lang sa listahan.
Pasalig sini nga antes paman magbukas ang mall, sila ang magaplastar na, apang tsekyaron pa nila kun mapahanugutan nga makasugod sang temprano bisan sarado pa ang mall.
Ang payout ang isa ka adlaw lamang patigayunon.
Para sa verification sang identity, panugyan ni Llena nga dal-on ang driver’s license kag iban pa nga valid IDs.
Madumduman nga 35 ka mga taxi drivers sang Christine Taxi ang nakabatun sang ila ayudad matapos magdangop sa Ipa-Bombo Ta segment sang Bombo Radyo Bacolod.
Kasunod sini, may masobra 20 pa nga nagpaapas sang ila nga mga dokumento gikan naman sa lain nga operator.
Sila ang ginatugyanan na lamang ni Llena nga magdangop sa ila operator kun sila ang yara sa listahan.
Sa pihak nga bahin, ginapahangop naman sini nga wala sang kaangtanan ang LTFRB NIR sa pagbuhin sang operator sang Christine Taxi sang P400 sa kada driver.// Nahibaluan nga P5,000 ang ila nabatun, apang bangod operator ang required nga magproseso sa LTFRB Region 6 sa Iloilo, P4,600 na lamang ang iya ginhatag sa drivers bilang bawi sa iya gingastos.
