Kasubo ang gindangatan sang pagtililipon sang magpamilya sa banwa sang Murcia matapos maglabuanay ang duha ka mag-utod kag nag-intra man ang ila tagsa ka anak nga nagresulta sa kamatayon sang duha kag pagkapilas sang duha.
Suno kay Police Major Robert Indiape, hepe sang Murcia Municipal Police Station, naga-inom kagab-i ang mag-utod nga sanday Windro, 58; kag Dennis Berganio, 52 sang Barangay Buenavista.
Ginapasuni nga nagmaoy ang magulang nga si Windro kag ginlabo sini ang manghod nga si Dennis nga gilayon man nga nagbalos.
Bangud nakit-an sang ila mga anak ang natabo, nagtambag ang 28-anyos nga bata ni Windro nga si Wilfredo kag nag-apin man kay Dennis si Daniel, 20-anyos.
Nakaangkon sang madamo nga pilas ang mag-amay nga Windro kag Wilfredo nga nagresulta sa ila kamatayon samtang ginabulong pa sa karon sa ospital sanday Dennis kag iya anak.
Ginahibalo naman sang mga pulis kun sin-o ang nagtiro sa mga napatay bangud magluwas sa pilas tuga sang paglabo, may igo man sang bala ang ila lawas.
Ini ang kasunod sang pahayag sang mag-amay nga suspetsado nga binangon lang ang ila hinganiban.
