Ginpasalig sang anay Magdalo Partylist Representative nga sila ang yara sa likod ni ex-Senator Leila de Lima karun nga ini ang nahilway na sa mga kaso.
Nahibaluan nga ginbasura na sang Regional Trial Court Branch 206 kahapon ang duha ka naulihi nga drug charges sa anay Senador, makaligad sang pito ka tuig nga pagkapriso.
Sa interview sang Bombo Radyo Bacolod kay former Magdalo Partylist Representative Gary Alejano, deserve gid ni De Lima nga makagwa bangod pato-pato lamang ang kaso nga ginfile batok sa iya.
Suno diri, tuman kaathag nga trump-up ang kaso bangod ang mga witnesses ang mga priso kag wala sang freedom nga nagasunod-sunod lamang sa mando agud nga indi mapabudlayan ukon patyon sa sulod sang bilibid.
Gani sang matapos ang termino ni former President Rodrigo Duterte, nga amo ang ginatudlo nga nagapamuno sa pagpasaka sang kaso, amat-amat man nga nagrecant sang statement ang mga witnesses.
Nagapati ini nga wala sang illegal nga transaksyon si De Lima sa sulod sang Bilibid sang magpungko bilang Justice Secretary, sa baylo ini pa mismo ang nagtinlo sa mga indi amo nga mga nagakatabo sa sulod.
Sa karun wala pa ang mga ini nakahinun-anon kay De Lima apang nagapati si Alejano nga nakahibalo gid ang anay Senador nga ang Magdalo ang ara lang sa likod sini nagasuporta.
Subong nga naklaro na ang kaso, dapat lang nga balikan sang anay Senador sang kaso si former President Rodrigo Duterte nga amo ang nag-ipit sa iya.
Suno diri sang Human Rights Commisioner pa lamang si De Lima, siya ang nagpamuno sa imbestigasyon sang Davao Death Squad gani siya ang gindumtan sang nagpungko bilang Presidente si Duterte.
Nagapati si Alejano nga nagakadapat lamang nga magbalik sa Senado si De Lima bangod kinahanglan sang pungsod sang maisog nga nagapanindugan sa kamatuoran sa Senado.
