Patay ang magpakaisa matapos nagbun-anay sa Purok 4, Brgy. Masaling, banwa sang Cauayan, Negros Occidental, sang Mayo 26 sang gab-i.
Ang mga napatay ang ginkilala nga sanday Saturnino Anghel, 42-anyos kag ang ginatudlo suspek nga si Renaldo Unabia, 35 anyos kag lunsay mga residente sang nasambit nga lugar.
Sa interview sang Bombo Radyo Bacolod kay Police Lt. Col. Garry Allan Resuma, hepe sang Cauayan Municipal Police Station, may yara sang inum-inom ang magpamilya kun sa diin nagluntad ang pagbinaisay bangud sa ginalantaw nga daan na nga hiligut-anon.
Suno kay Resuma, ginsaway man ang mga ini kag ginpapauli apang wala nagpauli si Unabia.
Sabaylo ginsulong ni Unabia ang bayaw sini nga si John Gonzales apang wala sila naglab-otanay.
Suno sa hepe ang naglab-utanay amo sanday Unabia kag Anghel kun sa diin nagbun-anay ang mga ini gamit ang talibong kag kutsilyo.
Lunsay nakaagom sang patal nga pilas ang duha nga nagresulta sa ila kamatayon.
Wala naman sang kasuhan bangud lunsay napatay ang mga ini apang ang ginakabig nga suspek amo si Unabia nga una nagpanghangkat sang away.
