Arestado ang magpamilya sa drug buybust operation nga ginpatigayon sa Sitio Bacagay, Barangay Daan Banua, ciudad sang Kabankalan, Negros Occidental, kahapon, alas- 6:50 sang aga.
Ang mga suspek ang ginalakipan sang amay nga si Sonny Boy Elicana, alyas ‘Jojo’, 44 anyos, nagatrabaho bilang tricycle driver; ang iloy nga si Meriel Mae Elicana, 40 anyos, wala sang trabaho kag ang ila bata nga si Laurenz Elicana alyas ‘Negro’, 21 anyos, wala sang trabaho.
Sa interview sang Bombo Radyo kay Police Captain Sammy Gasataya, Deputy Chief of Police sang Kabankalan City Police station, ang subject sa buybust operation amo si Meriel Mae kag sang ginbaklan ini sang poseur buyer ginsugo sini ang iya bana nga si Jojo nga kuhaon ang item samtang yara man sa sulod sang ila balay ang ila bata nga si Negro.
Suno kay Gasataya, nakumpiskar ang kapin sa 15 grams sang suspected shabu nga ginabanta nagabalor sang P102,000.
