Kadungan sang anibersaryo sang makasilidhi nga pag-atake sang Hamas militants sa Israel sang Oktubre 7, ginpahayag ni Israeli military spokesman Rear Admiral Daniel Hagari nga preparado ang Israel sa nagasaka nga pwersa sa karun nga adlaw kun sa diin ginalauman nga may mga pagpang-atake sa home front.
Sang Oktubre 7, 2023, ang wala ginlauman nga pagpang-atake sang Palestinian militants sa Israel ang nagresulta sa kamatayon sang 1,205 ka mga persona, kalabanan mga sibilyan, kag nalakip naman ang numero sang mga hostages nga nagkalamatay.
Pagkatapos sang isa ka tuig, nagapadayon sa gihapon ang gyera sang Israel sa Gaza batok sa Hamas apisar nga nagashift sa karun ang focus sa Lebanon kag Hezbollah.
Linibo naman nga mga protesters ang nagmartsa sa mga ciudad sa palibot sang kalibutan sang weekend kag nagapanawagan sang ceasefire sa Gaza kag Lebanon.
Sa Washington, masobra linibo ka mga protesters ang nagprotesta sagwa sang White House kag nagdemand sa Estados Unidos, ang top military supplier sang Israel nga maghatag sang armas kag aid sa Israel.
Suno kay Bombo International News Correspondent Elvie Pregua direkta sa Israel, nagapreparar sa karun ang gobyerno sang Israel kag ang mga pumuluyo sa posible nga pagpang-atake nga matabo kadungan sang anibersaryo sang Oktubre 7.
Suno sa iya, ginalauman nga may yara sang mga pagpang-atake nga matabo nagikan sa mga kasumpong sang Israel gani sila ang nagabantay gid sa mga alert sa ila cellphone.
Sila ang ginapanugyanan lamang nga gilayon nga magpadulong sa mga bomb shelters kag indi basta-basta magbukas sang pertahan sa mga nagapanuktok.
