Ginsiguro sang Malacañang nga kontrolado sang Marcos Administration ang sitwasyon sa pungsod sa tunga sang nagakaeksperyensyahan nga epekto sang tensyon sa Middle East, partikular ang padayon nga oil price shocks.
Ini ang nangin sabat sang palasyo matapos magpanawagan si House Deputy Speaker Raymond Democrito Mendoza kay President Ferdinand ‘Bongbong’ Marcos Jr. nga magdeklarar sang state of national emergency agud temporaryo nga makontrol sang gobyerno ang oil industry kag ang presyo sang produkton petrolyo.
Ginpaathag ni Palace Press Officer Undersecretary Atty. Claire Castro nga wala pa sa amo nga lebel sang krisis ang pungsod.
Ginhingyo ni Castro nga likawan ang pagpalapta sang balita nga makatuga sang kahadlok sa publiko.
Agud mabuhinan ang epekto sang krisis, ginplastar sang presidente ang mga tikang sang gobyerno.
Suno diri, magahatag sang fuel subsidies ang Department of Agriculture (DA) kag Bureau of Fisheries and Aquatic Resources (BFAR) para sa mga mangunguma kag mananagat.
Ginalauman man nga buhinan sang Civil Aviation Authority of the Philippines (CAAP) ang service charges sang pasahero lakip diri ang landing fees, parking fees, kag iban pa.
Nauna na nga ginpangunahan sang presidente ang pagpanagtag sang P5000 cash assistance para sa mga driver sang depasahero nga salakyan.
