Masobra P6.8 million nga balor sang suspeted shabu ang nakumpiskar sa isa ka 30-anyos nga lalaki sa ginpatigayon nga drug buybust operation sang Bacolod City Police Office – Drug Enforcement Unit (BCPO-CDEU) sa Purok Kawayan, Brgy. Banago, Bacolod City alas 7:15 kagab-i.
Sa interview sang Bombo Radyo kay CDEU Head Police Lt. Joven Mogato, ginkilala ang suspetsado kay Napoleon Begasa III alyas Toto, 30-anyos, residente sang Barangay Fortune Town, Bacolod City apang nagapuyo sa karun sa Purok Kawayan, Barangay Banago.
Suno kay Mogato, si Begasa ang isa ka newly identified drug personality kag high value individual.
Suno sa iya, madugay na nila ini nga ginamonitor kag kahapon, natigayon nila ini nga nadakpan kag nakuhaan sang 16 ka mga heat sealed transparent plastic sachet sang suspected shabu kag lima ka knot-tied transparent plastic bag nga nagaunod sang suspected shabu.
Ang nakumpiskar nga illegal nga druga ang may kabug-aton nga 1,010 grams kag may estimated market value nga P6,868,000.00.
Suno kay Mogato, may mga stocks sa iya posession si Begasa kag may nagadul-ong sa iya sang supply nga iya lamang ginameet-up.
Sa inisyal nga impormasyon sang CDEU, sa San Carlos sila nagakuha sang supply.
Sa karun si Begasa ang yara na sa kustodiya sang mga kapulisan kag magapangatubang sang kaso nga paglapas sa R.A. 9165b ukon Comprehensive Dangerous Drugs Act of 2002.
SAMTANG, ginpahayag ni Police Col. Thomas Joseph Martir, city director sang Bacolod Police Office, nga madugay naman nga ginamonitor sang mga otoridad si Napoleon Basa III apang kahapon lang ini nadkapan sang City Drug Enforcement Unit sa Purok Kawayan, Brgy. Banago, Bacolod City.
Nakuha sa paghinakop sini ang kapin 1,010 grams sang suspected shabu kag may yara sang standard drug price nga Php 6,868,000.00.
Suno kay Martir, ginaimbestigaran pa sang mga kapulisan kun sa diin naghalin ang nakompiskar nga illegal nga druga bangud ginpahayag sang suspetsado nga gintabo niya lamang ini sa down town sang syudad.
Ginpahayag man sang city director sang BCPO nga mahimo pasakaan sang kaso si Begasa subong nga adlaw, Lunes ukon sa madason pa nga adlaw.
Nagpanugyan man si Martir sa naga-engage sa illegal nga druga nga mag-untat na sa illegal nga buluhaton bangud kun indi, ang mga otoridad ang indi man mag-untat sa pagdakop sa ila kag nagpasalig man ini nga madamo pa sang police operations sila nga patigayunon.
