Patay ang isa ka tuig nga bata samtang padayon nga ginabulong ang anum ka tuig nga utod sini matapos masamaran sa nagluntad nga sunog bangud sa napabay an nga nakasindi nga kandila sa Purok Active, Brgy Mansilingan, Bacolod City, kapin alas- 11:30 sang gab-i, kagab-i.
Suno kay Fire Superintendent Jenny Mae Masip, fire marshal sang Bacolod City Fire Station, patay ang isa ka tuig nga bata nga babayi samtang pilason naman nga gindala sa ospital ang anum ka tuig nga magulang nga babayi.
Suno diri, wala sang kuryente sa balay kag naga-usar lang sila sang solar light.
Bangod nga fiesta sa purok, naggwa ang duha ka magulang nga menor de edad para maglantaw sa palagwaon sa purok samtang nabilin naman sa balay ang duha ka biktima kun sa diin ginbilinan sila sang nakasindi nga kandila nga gintongtong sa cabinet.
Suno sa katupad balay sang mga biktima, nakita sini sa ila pader nga may buho kag didto sini nakita ang anum ka tuig nga bata nga iya gilayon ginbutong.
Suno sa kaingod nila, wala man nagapangayo sang bulig ang anum ka tuig nga bata kag kaangay nga nagaka-urongan lang kag sang ginkuha na halin sa ila balay, amo na naghibi ini kag naghambal nga yara pa sa sulod ang iya manghod.
