Patay ang isa ka mangunguma matapos nga ginlabo kag nautod ang liog sa Purok Tamlang, Brgy Camingawan, Kabankalan City, Negros Occidental sang Oktubre 14.
Ginkilala ang biktima kay Sunny Dela Cruz, 42 anyos, lalaki, kasado, mangunguma kag residente sang Purok Pinamus-an, Brgy Camingawan, Kabankalan City, Negros Occidental.
Ang suspek ang ginkilala kay Redman Tawtawan, 28 anyos, lalaki, single, mangunguma kag residente sang Purok Pinamus-an, Brgy Camingawan, Kabankalan City, Negros Occidental.
Sa interview sang Bombo Radyo Bacolod kay Police Captain Sammy Gasataya, Deputy Chief of Police sang Kabankalan City Police Station, si Dela Cruz kag Tawtawan ang nag-inum sang makahulubog nga ilimnon pagkatapos sang ila pag-ani kag tresher.
Suno kay Gasataya, samtang nagainum-inum ang biktima kag suspek nagluntad ang komosyon.
Ginpakalma man ang duha apang sang manughalin na ang biktima nagkuha si Tawtawan sang binangon kag ginhan-usan sang duha ka beses si Dela Cruz nga nagresulta sa pagkautod sang li-og sini.
Nakaagom man ini sang pilas sa nawong.
Gindala sa ospital si Dela Cruz kag gindeklarar nga dead on arrival.
Nahibaluan nga masami sadto ginamauyan kag ginahangkat sang suspek sang lab-anay ang biktima, kag ini ang ginalantaw sang mga kapulisan nga rason sang krimen.
Ang mga residente na mismo ang nagdakop sa suspek kag sa karun nakahunong na sa Kabankalan City Police Station nga mahimo mangatubang sang kaso nga murder.
