Nagapangabay si MANIBELA Chairman Mar Valbuena nga masulosyunan sang Kongreso kag Senado ang nagakatabo nga pagpang-ipit sang gobyerno sa public transportation.
Nahibaluan nga kahapon ang deadline sang consolidation kag wala na nahatagan sang extension, apang ang MANIBELA ang wala nag-upod sa panawagan sa duha ka adlaw nga Nationwide Transport Strike humalin sang Lunes.
Sa interview sang Bombo Radyo Bacolod, luyag ni Valbuena nga mapaathagan ang Presidente sa kun ano ang matuod nga nagakatabo sa sektor sang transportasyon.
Suno diri, sa pagsulod sa consolidation ang mga operators ang wala na sang kaugalingon nga salakyan kag magaserbe na lamang nga ulipon sang kooperatiba.
Suno diri, madamo na sila sang na-ugrade nga traditional jeepney units agud makapasar sa Euro-4 standard, nga amo ang requirement sa PUV modernization.
Nagalaom si Valbuena nga ini ang makita man sang gobyerno.
Paathag sini nga ang pag-ugrade sang mga traditional jeepneys ang napatigayon nila nga wala nagpangutang kag wala man sang subsidy gikan sa gobyerno.
Magluwas nga napabilin ang iconic look sang traditional jeepneys, ini ang indi pa makatuga sang huol sa mga pasahero bangod indi kinahanglan magpasaka sang pletehan.
Suno diri, wala nagdangat sa P1 million ang ila na gasto nga tuman ka layo sa P2.4 million tubtob P2.8 million nga balor sang modernized jeepney units.
Dugang pa ni Valbuena nga ini mas mabakod kun ipaanggid sa mga ginhuman sa China, kun sa diin nagikan sa Japan ang ila nga gingamit nga makina, nga mas magalawig sa baylo nga magamit sang China-made nga dugay-dugay naga-abriya.
Ginakatingala sini kun ngaa ginapilit gid sang gobyerno ang pagkuha sang tuman ka mahal nga modernized jeepneys kasubong man ang consolidation sa kooperatiba ukon korporasyon.
Nagapati si Valbuena nga sarang lamang mapatigayon ang PUV modernization nga wala sang consolidation.
Magluwas sa desisyon sang Kongreso kag Senado, ginahulat man nila ang sabat sang Korte Suprema sa ginfile nga petisyon para sa Temporary Restraining Order (TRO) sang PUV modernization program nga ila ginfile sang Disyembre.
