Masobra 6,300 ka mga kapulisan ang i-deploy sa palibot sang Senado subong nga adlaw, Hulyo 6, bilang seguridad kadungan sang pag-umpisa sang impeachment trial ni Vice President Sara Duterte.
Suno kay Philippine National Police-National Capital Region Police Office (PNP-NCRPO) spokesperson Police Major Hazel Asilo, ginalauman nga mas damo ang magtililipon sa atubangan sang Senado.
May ara man huring-huring nga may isa ka grupo nga nagaplano nga magpatigayon sang parade padulong sa Senado, gani mas pasanyugon pa gid ang deployment sang mga kapulisan.
Apisar wala pa sang may naaprubahan nga permit para sa anuman nga rally tubtob sa Dominggo, ginpahayag ni Asilo nga bukas ang PNP-NCRPO sa mga grupo nga luyag magpatigayon sang protesta basta nagasunod sa husto nga proseso.
Magluwas diri, magapatuman man sang maximum tolerance ang kapulisan pananglitan ang mga raliyista ang magpaninguha nga magpalapit sa atubang ang Senado.
May yara man sang negotiation teams, samtang nagabantay naman ang mga public order units kun kinahanglan.
Natalana nga maga-umpisa ang impeachment trial subong nga adlaw, alas-2:00 sang hapon.
