BACOLOD CITY- Masobra sa P13 million nga balor sang suspected shabu ang narekober sang mga kapulisan sa buybust operation sa Dumaguete City, Negros Oriental.
Alas-5:10 kahapon sang hapon sang gin-operate sang gintingob nga pwersa sang Negros Oriental Police Provincial Office (NOPPO), Provincial Drug Enforcement Unit (PDEU) kag Philippine Drug Enforcement Agency (PDEA) ang suspetsado nga si Jake Lester Esquilona, 22-anyos sang Sitio Kabulakan, Brgy. Poblacion, Sibulan, sa Purok Makugihon, Brgy. Camanjac, Dumaguete City, Negros Oriental.
Nakuha sa paghinakop sang suspetsado ang isa ka dako nga heat sealed transparent plastic sachet sang suspected shabu, isa ka motorsiklo, cellphone kag ang marked money.
Nagabug-at sang kapin 2 ka kilo ang suspected shabu nga nakuha sa suspetsado kag may Dangerous Drugs Board (DDB) value nga P13,600,000.00.
Priso karun si Esquilona kag natalana nga pasakaan sang kaso nga paglapas sa Section 5, Article II sang RA 9165 ukon Comprehensive Dangerous Drugs Act of 2002.
