BACOLOD CITY — Gin-aprubahan na kahapon ang P412.7 milyones nga supplemental budget para sa mga proyekto sang provincial government sang Negros Occidental.
Nalakip sa amo nga pundo ang P300 milyones nga igabakal sang duta sa Barangay Matab-ang, ciudad sang Talisay nga pagagamiton nga motorpool sang probinsiya kag subong man ang sa Barangay Mansilingan nga pagapahamtangan sang housing project para sa mga empleyado sang kapitolyo.
Dugang pa ni Board Member Salvador Escalante, chairman sang Committee on Budget and Finance, nga magabakal man sang tag-masobra isa ka milyon ka pesos nga salakyan ang Provincial Engineering Office kag General Services Office para sa pagpatigayon sang imbentaryo sang mga propyedad sang probinsiya sa nagkalain-lain nga lugar.
May gintalana man nga P10 milyones para sa pag-dismantle sang floodlight sa Panaad Park and Stadium nga igasaylo sa ciudad sang Sagay.
Samtang, may P40 milyones naman nga alokasyon para sa pagbakal sang bag-o nga floodlight nga igapahamtang sa Panaad bilang kabaylo sang ginkuha nga pasilidad.
