Nagbululigay ang 61 ka Barangay kag pila ka ahensya kag departamento sa Bacolod City sa pagpatigayon sang massive clearing sang creek sa Barangay Banago, Bacolod City.
Gintambungan man mismo ni Bacolod City Mayor Greg Gasataya ang una nga adlaw sang operasyon.
Kalakip sa mga departamento kag ahensya nga nakigbahin amo ang Department of Public Works and Highways, City Engineers’ Office, City Disaster Risk Reduction Management Office, kapulisan kag yara man ang pila ka konsehal.
May-ara naman sang deployment plan, agud nga malapta sa lainlain nga area ang grupo sang mga nagapaninlo agud mas madasig ang clearing operation.
May ginpanagtag man nga sako, pala kag mga protective gears kaangay sang helmet, botas kag life vest bangod may bahin sang sapa nga madalom.
Ginpasalamatan ni Mayor Greg ang tanan nga nagsabat sa iya panawagan sa pagkooperar.
Paathag sini nga gin-una nila sa massive clearing ang Banago creek, bangod sang tinalikdan nga mga pagbaha, ang Barangay Banago amo ang may pinakamadugay nga pagsubside sang tubig-baha.
Pila ka lugar sa area ang nagdangat pa sa dughan ang kadalumon sang tubig, samtang nagtinir naman sa eskwelahan nga nagserbe vacuation site ang mga pumuluyo sa sulod sang duha tubtob tatlo ka adlaw.
Nagapanguna nila nga target amo ang makuha ang mga nagasupon nga basura agud mangin madasig ang pag-ilig sang tubig.
