Mismo mga miyembro sang Team Pacquiao ang aminado nga magadaog ang fighting senator batok kay Keith Thurman via decision sa July 21.
Sa interview sang Bombo Radyo Bacolod kay Coach Raides ‘Nonoy’ Neri, assistant coach ni Boboy Fernandez, mahimo nga maknockdown ni Senator Manny Pacquiao si Thurman apang wala sang knockout.
Santo sa mga nagliligad nga away ni Thurman suno kay Neri, nagadalagan ini sa sulod sang ring.
Aminado si Coach Neri nga maayo nga boksidor si Thurman apang indi ini kaangay ni Miguel Cotto nga counterpuncher.
Suno kay Neri, sampaton kag tested boxer si Pacquiao.
Sa pihak sini, ginahandaan sang Team Pacquiao ang Thurman tactic agud malikawan ang nadangatan sang Pinoy boxing legend sa Marquez fight.
Samtang, ginpahayag naman sang isa pa ka miyembro sang team nga si Rodel Mayol nga yara ang killer instinct ni Pacquiao apang mataas ang tsansa nga magadaog lamang ini via decision.
Suno kay Mayol nga trainer man sa Wild Card Gym sa LA, indi nila pagpiliton nga lagson ni Pacquiao ang American boxer kundi sa puntos nalang magalantaw ang jury.
Sa katapusan suno kay Mayol, magadaog si Pacquiao via split decision.
Kadungan sini, ginpalab-ot ni Coach Neri sa mga tagpalamati sang Bombo Radyo Philippines nga indi magkabalaka bangud handa na si Pacquiao sa iya away sa masunod nga bulan.
