Magapadala sang sulat ang alkalde sa ciudad sang Bacolod sa Energy Regulatory Commission (ERC) bangod sa reklamo sang mga Bacolodnon sa tuman nagid ka mahal nga electricity bill.
Sa pahayag ni Bacolod City Mayor Alfredo “Albee” Benitez, ang una nga reklamo sini sa ERC amo ang deklarasyon sang red alert sang Mayo 21 nga dapat automatic na nga nagadeklarar sang price freeze, gani sila ang nagalaom man sang mas manubo nga power rate.
Apang tuman gihapon ka taas sang generation charge, sa baylo nga dapat may-ara na sang secondary price cap.
Magluwas diri hibaluon man nila ang rasun sang ERC kun ngaa wala gihapon naaprubahan ang kontrata sang Central Negros Electric Cooperative Inc. (CENECO) sa Energy Development Corporation (EDC), apisar nga ini ang ginfile sang Marso 15, masobra duha ka bulan na ang nakaligad.
Suno sa alkalde sa kontrata, ang CENECO ang makabakal sang 20 megawatts sa balor nga P5.26 per kilowatt-hour (kWh).
Ginakatingala sang alkalde kun ngaa ini ang nalawigan sa pihak nga sadto ini ang ma-aprubahan sa sulod lamang sang 16 ka adlaw.
Madumduman nga sadto ang per kilowatt-hour nga rate sa CENECO ang yara lamang sa P11.96 apang bangod sa pagsaka sang generation charges sa ginakuhaan nga Wholesale Electricity Spot Market (WESM) ang rate subong nga Mayo ang nagsaka sa P15.12.
