Aminado si Bacolod City Mayor Alfredo “Albee” Benitez nga nakibot sang mahibaluan nga gindagdagan sang panibag-o nga 6-months suspension si Punong Barangay Noli Villarosa sang Barangay Tangub, Bacolod City.
Suno sa alkalde sang mabatun ang communication gikan sa Department of the Interior and Local Government (DILG) nga sila ang magaserbe sang suspension order gikan sa Office of the Ombudsman, gincontact man sini ang Punong Barangay.
Suno diri, kaangay nga top notcher na si Villarosa sa suspension, bangod ini ang halos tuig-tuig na lamang nagakasuspender.
Pahayag sang alkalde nga kaangay nga naanad na ang mga pumuluyo sa Barangay Tangub nga suspendido ang ila Punong Barangay.
Madumduman nga siya ang gindagdagan sang suspension may kaangtanan sa complaints sang duha ka Barangay Kagawad bangod sa delay nga sweldo kag pagpautang sa 10 porsyento nga interes.
Apisar sa bag-o nga suspension order, wala man nagdangop sa iya ang Punong Barangay agud magpabulig.
Nagapati si Benitez nga gamiton ni Villarosa ang tanan nga legal remedy nga sarang magamit kaangay sa pagfile sang motion for reconsideration.
Ang luyag lamang sang alkalde nga maseguro ang kahimtangan sang mga pumuluyo sa Barangay Tangub.
Sa karun padayun man ang pagtrabaho sang mga Barangay Officials sa pagpanguna ni No. 1 Kagawad Luz Atienza bilang officer-in-charge.
