Igapresentar ni Bacolod City Mayor Evelio “Bing” Leonardia kay Department of Tourism Secretary Bernadette Romulo-Puyat ang status sang tourism industry sa Bacolod subong man ang tourism recovery plan sang ciudad agud magapahagan-hagan ang epekto sang COVID-19 pandemic.
Si Leonardia ang magapresentar sa Tourism Stakeholders’ Meeting nga gin-organisar sang DOT sa Seda Capitol Central subong nga adlaw, Enero 19.
Igapresentar man sang alkalde ang public health situation sa ciudad kag sa mga kalakip nga lugar sa atubang sang DOT, city government kag private stakeholders.
Ginalauman man nga magpatigayon sang kaangay nga presentasyon si Governor Eugenio Jose Lacson para naman sa probinsya sang Negros Occidental.
Pagkatapos sang stakeholders’ meeting, may patigayunon nga ceremonial turnover sang DOT-DOLE financial assistance para sa displaced tourism workforce.
Bilang antisipasyon sa pamulong-pulong kaupod si Sec. Puyat subong nga adlaw, nagpatigayon sang meeting si Leonardia kahapon kaupod ang mga City Hall executive nga sanday Acting City Tourism Officer Sandra Ruth Sycip, Councilor Israel Salanga, pinuno sang Sangguniang Panlungsod Committee on Tourism; Executive Assistant Teresa Manalili, Atty. John Orola, special consultant on trade, tourism, and investments, kag Engr. Loben Rafael Ceballos.
