Nag-ugyon ang alkalde sa ciudad sang Bacolod sa gina-propose nga mass testing ni Congressman Albie Benitez kag Negros Occidental Governor Eugenio Jose “Bong” Lacson.
Nahibaluan nga luyag mag patuman sang probinsya kag ciudad sang “time out weekend” humalin Agusto 28 tubtob 31 agud magpatigayon sang mass testing.
Sa interview sang Bombo Radyo kay Mayor Evelio “Bing” Leonardia, ang ginapropose ang nagsanto man sa luyag sang mga infectious disease doctors nga nagahingyo man sang temporaryo nga time out.
Ang proyekto ang magasentro sa mga area nga yara sa sentro sang ciudad kag probinsya.
Magluwas sa Bacolod City, nalakip man sa programa ang ciudad sang Talisay, Silay, Bago kag banwa sang Murcia.
Suno kay Leonardia, ang mga area nga apektado sa lockdown sa tion sang mass testing ang pagasiguruhon nga wala sang may makagwa ukon makasulod.
Santo sa proposal, natalana nga ipatigayon ang mass testing sa Bacolod sa Agosto 28 kag 29 samtang sa Agosto 30 kag 31 naman ang sa probinsya sang Negros Occidental.
Igadungan ini sa Agosto 31 nga pyesta opisyal ukon Natioanal Heroes Day.
Gina-estimate nga yara sa 10,000 ang igapadalum sa RT-PCR test kun sa diin 5,000 ang magagikan sa Bacolod samtang ang nabilin nga 5,000 naman ang magahalin sa probinsya.
Gina-abisuhan nga magpabilin ang tanan sa tagsa ka puluy-an sa pagatigayon sang test agud nga matumod kun sin-o gid ang mga positibo kag gilayon nga mapain.
Gina-ekspektar ang posibilidad nga 20 porsyento sa 5,000 nga ipaidalum sa test ang mangin positibo sa ciudad ukon isa ka libo.
Magahingyo naman si Benitez kay Vince Dizon, deputy chief implementer kag testing czar sang COVID-19 Task Force, sang kinahanglanon nga testing kit para sa patigayunon nga mass testing agud nga makasave ang ciudad kag probinsya.
Gin-athag naman ni Governor Eugenio Jose “Bong” Lacson nga indi tanan nga mga pumuluyo ang ipaidalum sa mass testing.
Suno kay Lacson, kinahanglan nga symptomatic ang isa ka persona agud malakip ini sa mga ipaidalum sa RT-PCR test sang probinsya.
Suno sa iya, kinahanglan nga nagasuprer sang hilanat, sore throat kag pagkadula sang panabor ukon panimaho ang isa ka persona.
Gindugang man sang gobernador nga wala sang bayaran ang mga pumuluyo sa patigayunon nga mass testing apang nagalaom ini nga igareimburse sang PhilHealth ang gasto.
