Nagapati si Bicol Saro party-list Rep. Terry Ridon nga mayorya sa mga miyembro sang House committee on justice ang mahimo magboto agud ideklarar nga may “probable cause” ang mga impeachment complaint batok kay Vice President Sara Duterte.
Suno kay Ridon, indi na makabig nga simple nga “smoking gun” ang mga ebidensya kundi isa na ka “nuclear bomb” matapos ginpahayag sang Anti-Money Laundering Council (AMLC) ang gina-alegar makaduluda nga transaksyon nga naglab-ot sa P6.7 billion angot sa bise presidente kag sa pamilya Duterte.
Natalana nga patigayunon ang masunod kag posible final na nga hearing subong nga adlaw, Abril 29, kun sa diin ginalauman nga pagaistoryahan ang nabilin nga mga reklamo kaangay sang alegasyon sa pagpamahog kay President Ferdinand Marcos Jr., First Lady Araneta Marcos, kag anay House Speaker Ferdinand Martin Romualdez.
Ginalauman man ni Ridon nga aprubahan sang Kamara ang committee report nga magrekomenda sang impeachment kag makuha ang bastante nga boto agud mapasaka na sa Senado.
