Hugot nga ginpanindugan ni Senate President Pro Tempore Panfilo “Ping” Lacson nga ebidensya lamang ang mangin basehan sang iya desisyon kun patigayunon sa Senado ang impeachment trial batok kay Vice President Sara Duterte.
Suno kay Lacson, sundon lamang sini ang mga pagsulundan sang impeachment kag wala na sang iban pa nga lantawon nga basehan para sa iya mangin boto.
Ginpahanumdom man ni Lacson ang iya mga kaupod nga senador nga magpabilin nga magsunod sa mga pagsulondan bilang potensyal nga mga Senator-Judges, sa oras nga mapasaka na sa upper house ang Articles of Impeachment batok sa bise presidente.
Iya ginpaathag nga kinahanglanon nga magpabilin nga impartial ang mga senador kag siguraduhon nga ang ila mga tinaga ang wala nagapakita nga sila ang may gina-apinan.
Suno sa iya, indi maayo tulukon nga sila ang daw kaangay sang prosecutor ukon defense panel.
Samtang nagpabutyag man sang simpatiya ang senador kay Senate President Vicente “Tito” Sotto III, nga ginalauman nga maga-atubang bilang presiding officer sa posible nga impeachment trial.
Suno sa iya, mabug-at ang palas-anon ni Sotto, ilabi na sa pagdumala sa mga posible magtuhaw nga mga argument sa tunga sang kampo sang prosekusyon kag depensa.
Madumduman nga una na nga ginpahayag ni Sotto nga nagapreparar na ini sa posible nga mga hitabo rason nga ginatun-an niya ang mga impeachment rules, court rules, kag senate rules.
