BACOLOD CITY — Dapat nga maimbestigahan kun sa diin naghalin ang nagalapta nga mensahe tuhoy sa gin-alegar plano sang ISIS-Maute kag Bangsamoro Islamic Freedom Fighters (BIFF) nga pagpangatake sa mayor nga kaciudaran sa pungsod.
Sa interview sang Bombo Radyo, ginpahayag ni Bacolod City Police Office (BCPO) Director Police Senior Supt. Jack Wanky nga nagahatag sang kahadlok sa publiko ang amo nga impormasyon nga naghalin sa wala mahibaluan nga source bangud mangin sila sa kapulisan ang wala nakabaton sang opisyal nga komunikasyon tuhoy sa plano nga pag-atake sang mga terorista.
Bangud sini, ginaduso ni Wanky nga hibaluon kun sin-o ang nagpalapta sang impormasyon kag kun matukiban nga ini ang kumpirmado nga report apang nag-leak lamang, dapat man nga repasuhon ang ginapatuman nga security measures.
Ginpabutyag sang BCPO Director nga dapat mangin mahinalungan sa pag-uyat sang kasubong ka sensitibo nga impormasyon kag indi ini dapat nga basta na lang ipaguwa sa publiko.
