Nagpagwa ang convenor sang Power Watch Negros sang isa ka pahayag angot sa ginalauman sang mga konsumidor sa rehabilitasyon sang Central Negros Electric Cooperative (CENECO) sa tion nga magsulod ang Negros Electric and Power Corporation (NEPC).
Sa interview sang Bombo Radyo Bacolod kay Wennie Sancho, ginalauman sang mga konsumidor nga ang rehabilitasyon sa nasambit nga distribution utility ang indi lang mangin limitado sa repair ang kag pag-ilis sang daan nga equipments kundi ibalik ang madinalag-on nga operasyon kag pagsolbar sang mga problema.
Suno kay Sancho, kinahanglan man efficient ang distribution utility ilabi na sa paghatag sang solusyon sa masami nga pagluntad sang brownout.
Suno diri, ginalauman nga paagi sa NEPC mabalik ang financial well-being kag economic viability sang CENECO.
Ginalauman man nga reviewhon ang tanan nga polisa kag standards kag islan ini paagi sa pagdihon sang panibag-o nga polisa kag mangin maayo nga working environment.
Nagalaom man ang mga konsumidor nga ang mga empleyado sang CENECO nga irehire sang NEPC ang mangin bukas pagpatuman sang pagbag-o kag transformation sang distribution utility.
