Nakibot ang mga himata sang isa ka lolo sa banwa sang Isabela nga napatay sini ang iya 8-anyos nga apo nga naandan nila nga tawgon nga si Toto Robot.
Sa interview sang Bombo Radyo sa lola ni Robot nga si Jenelyn sang Sitio Aguntilang, Barangay Riverside, mabuot nga sahi sang tawo ang iya pakaisa nga si Pablo Talanas.
Sang nagpadulong si Robot sa balay sang iya lolo, natabuan nga nagainom ang suspetsado kag ginsinabad sang bata ang iya sumsuman.
Mahimo nga nadulman si Talanas suno kay Jenelyn kag ginbunggo sini sa semento ang ulo ni Robot kag ginsulsog pa sang stick ang iya alatrasan.
Sang natabo ang krimen, nagadigamo sa ila balay ang amay sang biktima nga si Ronilo gani wala siya nakahibalo.
Ang bangkay sang bata ang nasapwan sang tupad-balay ni Talanas bangud ginbilin niya ini sa higad sang dalan.
Suno sa lola, nagapamalay-balay gid man ang iya apo agud nga magpangayo sang pagkaon apang normal man lang ini para sa isa ka bata.
Sa pihak sini, mapisan suno kay Jenelyn ang biktima.
Suno sa hepe sang Isabela Police Station nga si Police Captain Roger Pama, handa na ang mga affidavit nga kinahanglanon para sa pagpasaka sang kaso batok kay Talanas kag ginahulat nalang ang availability sang pamilya.
Kaso nga murder ang ipasaka batok sa lolo.
Sang tinalikdan nga adlaw, nagpauli na ang iloy ni Toto Robot nga nagatrabaho sa Manila.
Ang biktima ang magulang sang agot.
