Nagapadayon pa ang imbestigasyon sang Bacolod Police Station 4 sa pagtiro-patay sa isa ka negosyante sa gwa sang isa ka convenience store sa Barangay Estefania, kahapon sang kaagahon.
Kahapon gintiro-patay sang duha ka mga wala makilal-an nga suspetsado ang Elson Casalan Cepeda, 49 anyos, residente sa East Homes 2, sa nasambitan nga Barangay.
Sa interview sang Bombo Radyo Bacolod kay Police Capt. Francis Depasucat, station commander sang Bacolod Police Station 4, ginahulat pa nila ang report nagikan sa Scene of the Crime Operation (SOCO) agud mahibaluan kun pila ang pilas sang biktima kag kun ano nga sahi sang long kag short firearms ang gingamit sa pagpatay sa biktima.
Suno kay Depasucat, ginatumod pa nila sa karun ang motibo sa pagpatay sa biktima.
Bangud wala man ini sang record sa Barangay kag sa mga kapulisan, ginalantaw nga ang motibo sa pagpatay sa biktima amo ang may kaangtanan sa negosyo.
Gin-athag man sini nga indi nagikan sa mga kapulisan ang ginpost nga CCTV footage sa social media sa pagpatay sa biktima.
Nagapanawagan man ang station commander sa kun sin-o man ang nakakita sa pagluntad sang krimen bukas ang Bacolod Police Station 4 agud mabuligan ang pagsolbar sang kaso.
