Amat-amat na nga nagabangon ang hog industry sa probinsya sang Negros Occidental nga naapektohan sang African swine fever kag hog cholera.
Sa interview sang Bombo Radyo Bacolod kay Ric Lauron, presidente sang Alliance of Hog Raisers Association of Negros Occidental (AHRANO), yara na sa 40 percent sang ila mga miyembro ang nakabangon na matapos nga mahalitan sang ASF kag hog cholera.
Suno diri, iban sa ila ang may maayo na nga produksyon sang mga baktin samtang ang iban naman ang nagapreparar na para sa holiday season, tion kun sa diin madamo sang magabakal sang baboy.
Apang, nagapanawagan si Lauron nga apisar naga-amat amat na sila sa pagbangon, kuntani mapanubo man ang presyo sang feeds bangod may yara pa sang nabudlayan nga magbangon sa dako nila nga kapierdehan sang nagkalamatay ang ila baboy.
Sa karun, ang presyo sang liveweight ang yara sa P175 tubtob sa P180 kada kilo, samtang nagnubo naman ang presyo sang karne sang baboy sa merkado bangod may yara na sang supesyente nga supply.
