Ginpahayag sang commander sang 302nd Infantry Brigade sang Philippine Army nga lunsay mga matag-as nga opisyal sang New People’s Army ang napatay sa nagluntad nga engkwentro sa Sitio Candiacap, Brgy. Tapi syudad sang Kabankalan, Negros Occidental, kahapon, Abril 27.
Sa interview sang Bombo Radyo Bacolod kay Brig. Gen. Joey Escanillas, ang mga napatay nga miyembro sang New People’s Army ang nagdangat na sa pito.
Suno kay Escanillas lunsay matag-as ang position sang mga ini.
Ang mga napatay ang ginkilala nga sanday sanday Jhonrey Mejares, alias “Jai/JR”, political instructor ukon political guide; Glendel Tinio Mejares, alias “Ayin”, isa ka medical officer; Charity Amacan, alias ” Cha/Leah”, isa ka Squad leader kag anay secretary sang South East Front, Reniel Locsin Cello, alias “Kumpol/Adie”, isa ka squad leader; kag si Mary Jane Maguilat, alias ” Shonie/Chinchin/Shedi”, vice squad leader kag asawa ni alyas Kumpol; Jhon Isidor Supelanas, alias “Dalia”, political instructor; kag amo si alias “Pitong”, medical officer.
Suno sa 302nd commander katapo ang mga ini sang remnants sang South East kag South West Front kag nagtingob agud mangin isa ka grupo.
Ginpahayag man sini nga maayo man ang sitwasyon sang mga sibilyan sa lugar.
Wala pa ini sang dugang nga impormasyon kun may napilasan nga sibilyan.
Dugang pa sini nga wala man sang nasamaran sa bahin sang tropa sang gobyerno bangud nga mandato sini nga sa tagsa ka operasyon magsuksok gid ang tropa sang vest agud nga may protection.
Narekober sa encounter site ang anum ka units sang M16 caliber rifle, isa ka unit kag M16 nga may M203, mga bandoliers kag magazine, bala sang 5.56 mm nga armas-luthang kag personal nga kagamitan sang mga rebelde.
