Aminado ang Philippine Army nga pila ka mga alkalde sa Negros Oriental ang naghingyo sa mga otoridad nga hugton pa gid ang ila pagbantay kasunod sang serye sang pagpamatay apang wala naistoryahan ang martial law declaration.
Sa interview sang Bombo Radyo Bacolod kay 303rd Infantry Brigade commander Brigadier General Benedict Arevalo, ginpahayag sini nga wala naistoryahan ang batas militar sa emergency meeting sang Provincial Peace and Order Council sang Lunes.
Nakaistoryahanay man si Arevalo kag ang alkalde sang Guihulngan City kun sa diin ginpanugyan sang army commander nga dasigon sang city government ang pagbakal sang mga CCTV cameras nga makabulig sa pagmonitor sa mga tawo nga nagagwa-sulod sa ciudad, kaangay sang ginhimo sang local government unit sang Tapaz, Capiz.
Bentaha man suno kay Arevalo kun madeklarar ang martial law bangud ginasaway sang militar ang mga alkalde nga masami nga wala sa ila banwa, bisan ang local government officials ang may kontrol sa ila lugar.
