Nagpatigayon sang clearing operation sang Explosive Ordnance Division and K9 unit sang Negros Oriental Police Provincial Office (NOrPPO) sa Siliman University sa Dumaguete City, Negros Oriental kahapon matapos nakabaton sang bomb threat.
Sa interview sang Bombo Radyo Bacolod kay NOrPPO spokesperson Police Captain Stephen Polinar, nagpatigayon sang clearing operations ang mga kapulisan sa nasambit nga unibersidad.
Suno kay Polinar, gin-mobilize man ang K-9 units sang Philippine Coast Guard kag Armed Forces of the Philippines agud nga magbulig sa pag-clear sa mga buildings nga nakasaad sa report sang ginapahayag nga bomb threat.
Suno diri, mga alas 6:00 ang takna sang gab-i nabaton sang mga kapulisan ang report sang bomb threat sa unibersidad kag gilayon man ang mga ini nagresponde.
Ginpahayag nga anum ka bomba ang gina-alegar nga ginbutang sa nasambit nga buluthuan.
Wala pa sa karun matumod kun sin-o ang naghimo sang bomb threat.
Panawagan ni Polinar sa publiko nga mangin kalmado kag kun may yara sang nabaton nga kaangay nga pamahog mag-report gilayon sa mga otoridad agud nga marespondehan.
Dugang pa sini, dapat likawan man ang pagpalapta sang peke nga balita kag dapat hulaton ang verified reports halin sa mga kapulisan.
Courtesy: The Weekly Sillimanian
