PRO NIR kaupod ang San Carlos City Police Station gilayon nga nagresponde sang na-monitor ang gina-alegar “bomb threat’ nga ginpalata sa social media kahapon

Gilayon nga nagresponde ang Police Regional Office Negros Island Region (PRO NIR) kaupod ang San Carlos City Police Station (SCPS) matapos ma-monitor ang gina-alegar “bomb threat’ nga ginpalata sa social media kahapon, Hulyo 11.

Santo sa ginpost sa account nga ginkilala nga si “Jim San” sa Facebook public group nga “6127 Marketplace San Carlos City”, nagpamahog ini nga may gintanom nga bomba sa mga eskwelahan kag iban pa nga establiyemento sa nasambit nga ciudad.

Sa interview sang Bombo Radyo kay Lt Col. Nazer Canja, Hepe sang San Carlos City Police Station Pasado alas-4:30 sa amo nga adlaw, ang San Carlos CPS kaupod ang Philippine Coast Guard (PCG) San Carlos Canine Unit and the City Disaster Risk Reduction and Management Office (CDRRMO), ang napatigayon sang bomb detection paneling sa San Carlos City Auditorium, Barangay 4, VIAST Outsource Solutions sa East Carmona Street, Barangay 4 kag Empire One BPO sa Eco Translink Highway, Barangay 2 nga ginapahayag gintanoman sang Bomba.

Suno kay Canja, matapos ang ma id-id nga pag-inspection sang mga otoridad, ginkumpirmar sang mga ini nga wala sang bisan ano nga explosives ukon suspicious items sa mga lugar.

Suno diri, makigkoordinar man ang kapulisan sa Regional Anti-Cybercrime Unit sang PRO NIR agud matumod ang indentity sang persona nga yara sa likod sang Facebook account nga nag-post sang bomb threat.

Dugang pa, padayon man ang pakig-angot sang mga otoridad sa iban pa nga ahensya samtang nagapdayon ang imbestigasyon.

Pahanumdom sini sa publiko nga ang bomb threat ang isa ka seryoso nga paglapas sa layi kag kun sin-o man ang napatud-an nga nagahimo sini ang posible nga magapangatubang sang kaso nga kriminal.

Ginapanugyan man sini nga mangin responsable sa paggamit sang social media kag gilayon nga ireport sa mga otoridad ang bisan ano nga pagpamahog agud gilayon nga marespondehan.