Nagdangat sa 92 ka pamilya ukon 285 ka mga indibidwal ang apektado sang pagbaha sa ciudad sang Talisay kahapon.
Sa interview sang Bombo Radyo Bacolod kay Dionela Madrona, pinuno sang Talisay City Social Welfare and Development Office (CSWDO), ginpahayag sini nga nagikan ang mga naapektuhan sang pagbaha sa Barangay Zone 8 kag Barangay Dos Hermanas.
Suno kay Madona, kalaban sa mga panimalay sa amo nga mga barangay ang malapit sa suba ukon creek.
Gilayon sila nga nagpanghatag sang hot meals sa mga pumuluyo.
Antes magpauli kahapon, ginpadal-an man sang CSWDO sang mga foodpacks ang mga ini.
Nagpanugyan si Madrona sa tanan nga mangin vigilante gid kag indi na magpakatig-a pa sa tion sang evacuation.
Sa karon nagaplano ang ciudad sang Talisay nga magpatigayon sang awareness raising and preparation para may yara na sang ihibalo sa tion nga may magluntad nga pagbaha.
