Madamo ang nanugunan sa pagpanaog sa posisyon ni Japanese Prime Minister Shinzo Abe.
Suno kay Bombo correspondent Josel Palma, ang 65 anyos nga si Abe ang ginakabig nga pinaka maayo nga nangin prime minister sang madamo nga pumuluyo sa Japan bangod sa dedikasyon sa pagserbisyo.
Sa pihak nga madamo pa ini sang dapat nga atubangon kag may isa pa ka tuig nga nabilin nga serbisyo, ginpakamaayo sang Prime Minister nga manaog sa posisyon bangod sa indi maayo nga health conditon.
Nahibaluan nga nangin Defense Minister si Abe sang Japan sadtong 2005 tubtob 2006 kag una naman nga gin-elect bilang Prime Minister sadtong 2006 tubtob 2007 sang nagresign ini bangod sa balatian nga ulcerative colitis.
Nag-ayo naman ang pamatyag sini gani na re-elect sa 2nd term bilang Prime Minister sang 2012.
Nangin landslide naman ang pagdaog sini sa 3rd term sang 2014, kasubong man sa termino sadtong 2017 kag 2019 bilang Prime Minister.
Apisar nga madamo ang nakanugon, mas ginpakamaayo ni Abe nga manaog sa posisyon agud nga mahatagan pagtamod ang pagpabulong sa balatian.
Madamo man ang nagdayaw kay Abe bangod nakita sang mga ini nga matuod ini nga statesman.
Samtang wala paman sang pat-ud sa karun kun sin-o ang mangin successor sini sa posisyon bilang Prime Minister sang Pungsod.
Nahibaluan nga magapabilin ini sa pwesto tubtob sa may maibutang na nga panibag-o nga magabulos sa ginbuy-an nga posisyon.
Nanugunan man ang mga Filipino Community Leaders sa Japan bangod sa pagpanaog ni Japanese Prime Minister Shinzo Abe bangod nangin patas ini para sa tanan kag wala sang diskriminasyon.
Suno kay Jocel Palma, Bombo correspondent sa Japan, sang tion sang crisis tuga sang COVID-19 naghatag ini sang assistance indi lang sa kada household kundi sa kada persona apisar sang edad basta nakarehistro sa City Hall.
Madumduman nga nagbisita sa Pilipinas si Abe sadtong Hulyo 2013 kag nakipagkita kay anay President Benigno Aquino III samtang nagbalik naman ini sang Enero 2017 kag nakipagkita naman kay President Rodrigo Duterte kun sa diin nagbisita pa ini sa balay sang Philippine President.
Sumugod bulan sang Hunyo subong nga tuig, may ginapatigayon na nga regular check up si Abe kag pabalik-balik ini sa ospital.
Ginapatihan sang mga Pilipino sa Japan nga masunod nga Prime Minister ang magahalin sa Liberal Democratic Party (LDP) nga ginapamunuan ni Prime Minister Shonzo Abe kag padayunon nalang sang mga ini ang nasugudan sang magapanaog nga pinuno.
