Dr. Mary Joanne Balasa 
Dr. Kyle Habaradas
Tuman ang pag-pasalamat sang Post-Graduate-Intern (PGI) Medical student sang Bacolod Adventist Medical Center (BAMC) sa Bombo Radyo Philippines bangud sa gin-patigayon nga free medical mission paagi sa Bombo Medico 2019.
Sa interview sang Bombo Radyo kay Dr. Kyle Habaradas, iya gin-pakigbahin ang una niya nga eksperyensya sa nasambit nga aktibidad sang estayson.
Suno sa iya, apisar sa linibo nga numero sang mga pasyente nga iya naatubang sa Negros Occidental Multi-Purpose Activity Center (NOMPAC) sa diin ginhiwat ang Bombo Medico kahapon, iya ini sa gihapon “na-enjoy”.
Ginpahayag man ni Habaradas nga indi na bag-o para sa iya ang ini nga hilimuon bangud man sa mga na-encounter niya sadtong naga-intern pa lang siya sa West Visayas State University Medical Center ukon Don Benito sa syudad sang Iloilo.
Ang ini nga tikang sang Bombo Radyo suno sa iya ang isa gid ka manami nga buluhaton bangud diri makit-an nga kinahanglanon gid sang mga pumuluyo nga makapa-konsulta sang libre agud mahibaluan ang ila ginabatyag sa lawas.
Nagalaum naman si Habaradas nga liwat siya makaupod sa patigayonon nga Bombo Medico sa tuig 2020 bangud suno sa iya, yara na nakatatak sa iya tagi-pusuon nga maghatag sang libre nga serbisyo kag bulig sa mga tawo nga indi makasarang mag-pakonsulta sa doktor.
Samtang, ginakabig naman sang isa ka PGI sang BAMC nga fulfilling ang iya paghatag sang libre nga serbisyo sa linibo ka mga pasyente nga nagtambong sa Bombo Medico 2019 kahapon nga adlaw.
Sa interview kay Dr. Mary Joanne Balasa, manami sa balatyagon nganakabulig siya sa mga tawo nga naga-kinahanglan gid sang libre nga konsultasyon.
Makatalandog man sa tagui-pusuon suno sa iya sa tion nga iya mabatian ang tinaga nga “salamat” gikan sa mga pasyente nga iya gin-serbisyohan.
Ang Bombo Medico suno kay Balasa ang isa man ka manami nga pag-umpisa para sa ila nga mga PGI padulong sa pagka-professional nga doktor sa ulihi.
Naga-pasalamat man si Balasa sa Bombo Radyo Philippines bangud sa tuigan na nga pag-patigayon sang Bombo Medico sa diin libre nga maka-pakonsulta kag maresitahan sang bulong ang mga pumuluyo nga wala sang ikasarang nga mag-palantaw sa doktor.
