Nakatipon sang kapin P1.8 million nga inisyal nga pondo ang mga pulis sa Negros Occidental bilang kabahin sang Bayanihan Fund Challenge nga ibulig sa mga pumuluyo nga nagakinahanglan subong nga may yara sang coronavirus disease 2019 (COVID-19).
Sa interview sang Bombo Radyo Bacolod kay Negros Occidental Police Provincial Office director Col. Romeo Baleros, ginpahayag sini nga kabug-usan nga P1,795,500 na ang ila natipon nga pondo.
Boluntaryo nga nagdonar ang mga pulis sang kabahin sang ila sweldo kun sa diin pinakamanubo nga ginhatag sang mga ini ang P1,000.
Samtang, tunga naman sa sweldo ni Baleros ukon P40,000 ang ginhatag sini para sa ila nga Bayanihan Fund Challenge.
Suno sa iya, sa tion sang krisis dapat mag-share gid ang tanan sang grasya nga yara sa ila.
Nagapati man ang provincial director nga malab-ot sang Philippine National Police ang target sini nga P200 million bangud sa pinakaulihi nga data, nagadangat na sa P132 million ang natipon sang bilog nga PNP.
