Gilayon naman nga gin-evacuate ang pila ka mga indibidwal gikan sa Barangay Pula, Canlaon City, ang barangay nga malapit sa Mt Kanlaon.
Suno kay Councilor Alvin Avela, gin-evacuate na ang kapin sa 100 ka mga indibidwal apang may yara pa sang iban nga nabilin sa ila mga puluy-an.
Gilayon man ini nga nagpanagtag sang facemask sa mga evacuees bangod sa tuman ka baho sang azufre.
Samtang, gin-evacuate man ang 127 ka mga inidibiwal naggikan sa Barangay Masulog, kasunod sa pagpasaka sa Alert Level 2 sa Mt Kanlaon.
Suno naman kay La Castellana Municipal Mayor Rhumyla Nicor-Mangilimutan, nag-conduct ini sang emergency meeting kaupod ang Disaster Risk Reduction and Management Council (DRRMC).
Suno diri, may mga area na nga naga-ulan sang lutak kag madamol na ang ashfall kun sa diin nangin mabudlay na ang pagbyahe sa dalanon.
Nagpasalig man ini nga handa ang banwa sa pagresponde kag pagbulig samtang nagapadayon ang pag-abot sang mga reports sa sitwasyon sa Mount Kanlaon.
May ashfall naman nga nareport kagab-i sa Barangay Upper Ilijan kag Upper Mailum, Bago City.
Suno kay Bago City Mayor Nicholas Yulo, nakapamaniho na sang sulfur ang mga pumuluyo sa duha ka barangay.
Suno kay Yulo, gin-evacuate gilayon ang mga pumuluyo nga indi makaagwanta sa baho sang sulfur.
Suno sa alkalde, masami sila preparado para sa pag-alburuto sang Bulkan Kanlaon gani madamo sang mga salakyan nga pwede nila magamit sa evacuation.
Nagpanawagan naman ang alkalde sa mga pumuluyo sa Bago nga magsunod sa mandu sang mga otoridad may kaangtanan sa evacuation apang indi lang magpanic.
