UNITED KINGDOM – 90 porsyento na sang populasyon nga nagaedad 60 pasaka sa United Kingdom ang nabakunahan batok sa coronavirus disease.
Sa report ni Bombo correspondent Ramil Isogon nagikan sa England, masobra na 23 million ang natublukan sang first dose sang Pfizer vaccine samtang masobra 1.35 million naman ang nakakumpleto sang duha ka dose.
Gin-aprubahan naman sang European Union regulators ang paggamit sang bakuna sang Johnson & Johnson’s kag ini na ang ikaapat nga bakuna nga ginhatagan sang approval.
Kadungan sini, padayunon man ang paggamit sang Oxford University-AstraZeneca vaccine sa populasyon sang UK.
Pila sa mga nabakunahan ang nagreport sang mild indications apang kalabanan sa mga ini ang nagbatyag sang muscle pain kag hilanat.
Nagikan sa kabug-usan nga 67 million nga populasyon sang UK, 30 porsyento na ang nabakunahan.
Ginhold man sang tinalikdan ang pagdeliver sang bakuna nga gindevelop sang AstraZeneca sa iban nga pungsod bangud sa kakulang sang supply. Samtang, tunga ang reaksyon sang populasyon sa United Kingdom sa ginbuyagyag nanday Prince Harry kag misis nga si Meghan Markle batok sa mga pagsulundan sa sulod sang British monarchy.
Madumduman nga sa interview sa batikan nga host nga si Oprah Winfrey, ginhaboy ni Meghan ang akusasyon angot sa racism bangud sa kaitom sang panit sang iya anak kag indi man ini mahatagan sang security sang institusyon bangud wala siya sang titulo.
Sa report ni Bombo correspondent Ramil Isogon nagikan sa England, wala pa sa karon sang direkta nga sabat ang monarchy angot sa pasabog ni Meghan kag Harry samtang ginpahayag naman ni Prince William sa ambush interview nga wala nila ginatolerar ang racism.
Tubtub subong, wala pa nakaistoryahanay ang mag-utod nga Prince William kag Harry.
Santo sa survey sa mga nagaedad 18 tubtub 25, 48 porsyento sa ila ang nagasimpatiya kanday Harry kag Meghan samtang 15 porsyento naman ang nagaapin sa royal family.
Sa mga nagaedad naman 25 tubtub 49, 28 porsyento ang nagaapin kay Meghan kag 22 porsyento ang apin sa mga royals.
Samtang, malapit katunga naman sang naga-edad 50 ang nagaapin sa monarkiya, kag mas labi sa mga nagaedad sang 60 pasaka nga nagapabor kanday Queen Elizabeth.
Pila naman ka kilala nga media personality sa UK ang nagresign, kaangay na lamang ni Piers Morgan sang Good Morning Britain, matapos ang komento nga nagapabor sa royal family bangud wala sila nagapati sa mga patutsada ni Markle.
