Ginahulat sa karun sang mga residente sang Purok Villagracia, Barangay Bata, Bacolod City ang refund gikan sa Home World Construction angot sa ila nga naggasto sa bulong kag sa pagpa-ospital sang ila bata nga nagmasakit bangod sa tuman nga yab-ok gikan sa construction site.
Sa interview sang Bombo Radyo Bacolod kay Reggie Malagsic, nakighinon-anon na ini sa Home World Construction kag ginkasugtan nga igarefund ang tanan nga naggasto sa bulong kag pagpa-ospital sa mga kabataan.
Suno diri, isa ka bata ang nagpaconsulta kag ginresetahan sang bulong samtang duha ka bata ang gin-ospital, lakip na diri ang bata sini.
Ang tatlo ka bata nag-eksperyensya sang ubo, sip-on, pagsuka kag diarrhea bangod sa tuman ka yab-ok.
Sila ang gintugyanan nga hatagan sang refund basta may yara sang resibo ukon resita nga mahatag.
Nagahingyo ini sa karun nga mahatag na ang refund bangod man nga isa na ini ka semana nga wala nakatrabaho bangod sa pagbantay sang iya bata nga ginmasakit kag nakaligad lamang sang napatay ang asawa sini.
Nagpanawagan naman ang Punong Barangay sang Barangay Bata nga panilagan ang sitwasyon kun tuman pa ang yab-ok matapos nga nagbutang na sang crackstone sa dalan kag gate ang Home World Construction agud mapahagan-hagan ang pagsulod sang yab-ok sa mga residente sang Purok Villagracia, Barangay Bata, Bacolod City.
Sa interview sang Bombo Radyo Bacolod kay Punong Barangay Remus Abaring, ginsalo na sang Home World Construction ang naggasto sa bulong kag pagpa-ospital sa mga bata nga nagmasakit.
Suno diri, nabutangan na sang crackstone ang dalan nga gina-agyan sang truck kag ginasunod naman basa ang dalan kag may yara naman sang ginbutang nga gate.
Luyag sini sa karun nga panilagan ang sitwasyon sang mga residente kun ano ang mangin resulta sang pagbutang sang tikang sang Home World Construction.
