Ginpaathag sang coach kag referee sa football ang mga sahi sang violations nga mahimo makomiter sang isa ka player sa hiwaton nga 2022 FIFA World Cup sa Qatar.
Sa interview sang Bombo Radyo kay Coach Dennis Estaniel, exciting ang hampang nga football.
Ang referees sa FIFA ang ginpaidalom sa maid-id nga selection process kag didto na sila sa Qatar isa ka bulan antes ang pagsugod sang 2022 FIFA World Cup.
Ginpatpat ni Estaniel ang mga rules sa football nga labi nga ginklaro antes ang pagsugod sang FIFA World Cup.
Isa na diri ang hand ball ukon pagkadto sang bola sa kamot sang player.
Suno kay Estaniel, mangin offense ang hand ball kun ang kamot sang player ang nagkadto sa bola, apang kun ang bola naman ang nakatandog sa kamot, indi ini offense.
Kun ara naman ang kamot sang player sa ibabaw sang iya nga ulo kag naigo sang bola, automatic ini nga hand ball offense bangud yara ang contention nga ngaa ara ang kamot sa ibabaw sang bola – buot hambalon, may intensyon ang player nga hikapon ang bola.
Ikaduha amo ang offside – buot hambalon, indi mag-una ang forward sa depensa kag sa bola.
Kun nakaposisyon ang attack sang offside, indi pa ini matawag nga offense kun wala pa siya nakabaton sang bola ukon wala ini nagpalapit sa bola.
Sa bahin sang hatagay sang card sa mga player, ginpaathag ni Estaniel nga wala ginahatagan sang card ang player kun careless foul ukon indi niya hungod nga matandog ang bola.
Apang kun nakuha sang player ang bola bangud gusto gid niya kuhaon, wala ini sang card bangud ini ang ginatawag nga fair challenge.
Ang yellow card ang ginahatag kun nag-agaw ang isa ka player kag yara sa reckless manner naman ukon may speed, distance kag force.
Kun red card sa challenge, may yara sang speed, distance, force kag open studs ang point of contact.
May red card man sa denying and obvious goal scoring opportunity kun sa diin ang forward ang naga-one-on-one sa goalkeeper kag siya ang gin-foul.
Kun ini ang natabo sa gwa sang penalty box, ini ang ginatawag nga red card, apang kun sa gwa sang penalty box, ini ang ginareduce sa yellow card.
Yara naman ang SPA ukon Stop Promising Attack nga automatic nga hatagan sang yellow card ang player.
Ang Stop Promising Attack ang nagakatabo kun ang isa ka player ang halin sa counter-attack, naghimo ang depensa sang duty foul kag ang player nga nagaatake ang wala sang tsansa nga maka-goal, apang kun wala ini gin-foul makadiretso ini kuntani atake.
