Natigayon nga makuha ni Mico Villaran ang ikaduha nga gold medal sa nagapadayon nga Palarong Pambansa 2025 sa Ilocos Norte apang may ginpaiway nga hampang bangud sa kondisyon sini.
Nakuha ni Villaran ang ikaduha nga medalya paagi sa 400 meter hurdles Secondary Boys.
Siya ang estudyante sa Romanito Maravilla National High School sa Barangay Estefania, Bacolod City.
Sa interview sang Bombo Radyo Bacolod kay Coach Miguel Arca, bangud si Villaran ang nakakuha sang apat ka gold sa regional meet siya ang ginline-up sa 100 meter hurdles.
Suno kay Arca, sang aga nakita sini nga daw may lain sa routine ni Villaran kag sang nakatapos ini practice nagsululuka ini gani gintawag siya sang isa man sa mga trainers.
Bangud sini nagdesisyon ini nga indi nalang pagpadalaganon sa 100 meter hurdles Secondary Boys kag ireserba nalang ang kusog sini para sa madepensahan ang kaugalingon nga record sa 400 meter hurdles Secondary Boys.
Tuman man ang kalipay ni Arca nga nadepensahan ni Villaran ang kaugalingon sini nga record matapos makuha ang ikaduha nga gold medal sa Palarong Pambansa 2025.
Suno kay Arca, sa ginakuha sini nga team importante ang height kag ginatudluan niya gid ini sang disiplina sa kaugalingon kag mind conditioning.
Wala man ini nagabaton sang mga excuses sa trainings bangud luyag gid sini nga makatuon sang disiplina ang mga atleta.
Suno diri wala ang mga ini nagauntat sa pagtraining sa bilog nga tuig.
Ang mga gold medal nga nakuha sang atleta ang bunga lamang sang ila nga pagsakripisyo kag pagtinguha nga malab-ot sang mga ini ang ila nga handum.
