Patay ang isa ka miyembro sang Forest Ranger Enforcement Unit sang Department of Environment and Natural Resources matapos gintiro sang riding-in-tandem sa probinsya sang Negros Oriental kahapon sang hapon, Abril 24.
Sa impormasyon nga nakuha sang Bombo Radyo Bacolod gikan sa Bais City Police Station, pasado las-2:00 kahapon sang hapon sang nakabaton sang impormasyon ang ila talatapan nga may yara sang shooting incident sa Sitio Checkpoint, Barangay Panalaan syudad sang Bais.
Gilayon naman nga nag-responder ang mga kapulisan sa lugar sa diin naabtan na lang nila nga nagahuray-ad na sa semento ang biktima nga ginkilala kay Rodrigo Reyes, 59 anyos, kasado kag residente sang Sitio Lighi, Barangay Mabunao sang amo nga syudad kag isa ka miyembro sang Forest Ranger Enforcement Unit sang DENR.
Base sa imbestigasyon, naga-panyaga si Reyes upod ang abyan sini sa Jezila Store sang naglabay ang duha ka wala makilal-an nga lalaki sakay sa motorsiklo samtang may tabon sang ginapahayag tela ang ila nawong kag gintiro ang biktima sa diin may igo ini sa liog nga gin-tunaan naman sang iya gilayon nga kamatayon.
Apang wala pa nakontento ang mga suspetsado, ila pa gin-palapitan ang biktima kag liwat nga gintiro.
Matapos ang krimen, gilayon naman nga nag-palagyo ang duha ka suspetsado dala ang sling bag sang biktima nga gina-alegar may unod sang kwarta nga naga-balor P100,000, kag iban pa nga mga kagamitan.
Gin-padangat pa sa Bais City Health Office si Reyes apang ini ang wala na natabangan.
Narekober naman sa crime scene ang 3 ka empty shells kag 1 ka deform slug sang 45 calibre pistol.
Ginalantaw naman sa karun sang mga kapulisan nga holdup ang motibo sa pag-patay sa biktima bangud nga ini ang naga-pautang sang kwarta.
Date of airing: April 26, 2019
