Modernized Jeep drivers, nagapatigayon na lamang sang skeletal nga pagbyahe

Kasunod sang asod asod nga pagsaka sang presyo sang produktong petrolyo ang mga operator sang modernized jeepney ang nagpatuman nalang skeletal nga pagbiyahe.

Sa interview sang Bombo Radyo Bacolod kay Dianne, isa sa mga operator sang modernized jeep, pila nalang ka units ang ila nga ginpagwa agud nga magbiyahe bangud sa tuman nagid kamahal sang produktong petrolyo.

Suno kay Dianne, ini nalang ang ila ginhimo agud nga bisan paano makaincome man.

Apang suno diri kun magsaka pagid ang presyo sang gatong magauntat nalang gid sila sa pagbiyahe.

May mga driver kag konduktor na nga nagpauli bangud haluson man sila makaincome.

Nagapanawagan man ini sang bulig gikan sa Local Government Unit.